Финалето во НБА започнува доцна вечерва со првиот натпревар помеѓу Сан Антонио Спарс и Њујорк Никс. Пред натпреварот за шампионската титула, НБА објави податоци што ја потврдуваат огромната популарност на овогодинешниот плејоф. Според официјалната статистика, плејофот 2025/26 беше најгледан во последните речиси 30 години, со просек од 5,3 милиони гледачи по натпревар.
Податоците вклучуваат гледаност на ABC, ESPN, NBC, Peacock и Prime, кои имаа права за емитување на плејофот оваа сезона.
Финалето на Западната конференција помеѓу Спарс и Оклахома Сити привлече особено голем интерес. Серијата привлече просечно речиси 11 милиони гледачи по натпревар, што е највисоко ниво во последните 24 години.
Најважниот момент беше решавачкиот седми натпревар, кој ги сруши рекордите на гледаност. Драматичниот дуел го гледаа дури 17,7 милиони гледачи на NBC, што го прави еден од најгледаните натпревари од плејофот на НБА во модерната ера.
Финалната серија помеѓу Никс и Спарс ќе ја емитува ESPN, а НБА очекува дека големиот интерес на публиката ќе продолжи и за време на борбата за шампионскиот трофеј.
Со оглед на традицијата на двата клуба, квалитетот на составот и атмосферата што владее меѓу навивачите, се очекува дека овогодинешното финале на НБА ќе привлече милионска публика низ целиот свет и дополнително ќе го потврди растот на популарноста на најсилната кошаркарска лига во светот.
