Интер е првиот финалист во Купот на Италија. „Нероазурите“ губеа со 0:2 на „Џузепе Меаца“ против Комо, но во последните 20 минути направија пресврт во натпреварот на 3:2 во своја корист.
Првиот натпревар на почетокот на март заврши 0:0, а денес Комо доминираше пред паузата и заслужено поведе со голот на Мартин Батурина (32′). На почетокот на второто полувреме, Лука да Куња го удвои водството на тимот предводен од Сеск Фабрегас.
Интер беше потпрен до ѕид, но покажа карактер и класа. Во 69-тата минута, Хакан Чалханоглу ја намали разликата, а во 86-тата минута, турскиот интернационалец повторно постигна гол за 2:2. Победничкиот гол за миланскиот гигант го постигна резервистот Петар Сучиќ во 89-тата минута. Хрватот имаше огромен придонес за успехот, бидејќи претходно асистираше за головите на Чалханоглу.
На 13 мај, фудбалерите на Кристијан Киву ќе се соочат со победникот од натпреварот Лацио – Аталанта за трофејот
