По долги дискусии меѓу УЕФА и организаторите во Катар, денес беше објавено дека, поради моменталната политичка ситуација во регионот, Финалисима, која се игра меѓу победниците на УЕФА ЕУРО 2024, Шпанија, и победниците на Копа Америка 2024, Аргентина, нема да се одржи во Катар на 27 март, како што беше првично планирано.
Во УЕФА и меѓу организаторите постои големо разочарување што околностите и временската рамка не им дозволија на тимовите да се натпреваруваат за овој престижен трофеј во Катар – земја која многу пати докажа дека може да организира врвни меѓународни настани на најсовремени стадиони, објави УЕФА на својата официјална веб-страница.
УЕФА изрази длабока благодарност до организацискиот комитет и надлежните катарски власти за сите напори вложени во обидот да се организира натпреварот и рече дека верува дека мирот наскоро ќе се врати во регионот.
Финалисима беше воведена како дел од тесната соработка меѓу УЕФА и КОНМЕБОЛ, со што ги здружија европските и јужноамериканските шампиони за да го прослават фудбалот на највисоко репрезентативно ниво. Аргентина, актуелниот светски шампион, го освои првото издание во 2022 година, победувајќи ја Италија со 3-0 на Вембли во Лондон.
Во обид да го спаси овој важен натпревар, УЕФА, и покрај разбирливите тешкотии за преместување на натпревар од толку голема важност во толку краток рок, разгледа други одржливи опции, од кои ниту една не беше конечно прифатена од Аргентинската фудбалска асоцијација.
Првата опција беше натпреварот да се игра на стадионот „Сантијаго Бернабеу“ во Мадрид во првобитното време, со поделба на навивачите на трибините 50:50. Ова ќе обезбедише врвна атмосфера што доликува на таков престижен настан, но Аргентина ја отфрли оваа опција.
Друга опција беше Финалисима да се игра во два натпревари – едниот на стадионот „Сантијаго Бернабеу“ на 27 март, а другиот во Буенос Аирес за време на меѓународната пауза пред УЕФА ЕУРО и Копа Америка 2028, исто така со сооднос на навивачи 50:50 за натпреварот во Мадрид. Оваа опција исто така беше отфрлена.
На крајот, УЕФА побара од Аргентина гаранција дека натпреварот може да се игра на 27 март, како што беше планирано и објавено на 18 декември 2025 година, или алтернативно на 30 март, доколку може да се најде неутрално место во Европа. Овој предлог исто така беше одбиен.
Аргентина потоа предложи натпреварот да се игра по Светското првенство, но бидејќи Шпанија немаше слободен датум, и оваа опција беше отфрлена. На крајот, Аргентина, спротивно на првично договорениот план натпреварот да се игра на 27 март, посочи дека ќе може да игра само на 31 март, датум што се покажа како неизводлив.
Од сите горенаведени причини, УЕФА жали што ова издание на Финалисима ќе биде откажано.
УЕФА на крајот им се заблагодари на Реал Мадрид и на организацискиот комитет и на катарските власти за нивната поддршка и соработка во обидот да се организира овој натпревар. Во случајот со Реал Мадрид, беше истакнато дека нивните напори беа направени во исклучително краток рок. Исто така, им се заблагодари на Шпанската фудбалска федерација за нејзината флексибилност и подготвеност да се прилагоди на сите опции разгледани за време на процесот.
