Вревата за НБА Европа станува сè погласна, а таа дефинитивно ќе стартува во 2027 година. Ги слушнавме најновите информации од заменик-комесарот на НБА, Марк Тејтум, а играчи кои играле и во Европа и во Америка исто така се изјаснуваат сè почесто.
Еден од многуте што го изрази своето мислење за новиот проект е Данило Галинари. Легендарниот италијански кошаркар во интервју за „Кориере дела Сера“ нагласи дека има позитивно мислење за новиот проект.
„Ми се допаѓа проектот НБА Европа и едвај чекам да оживее. Квалитетот на европската кошарка е толку висок, но ни треба систем што функционира. Играта, навивачите, полните сали, сето тоа е одлично, но додека во НБА односот е 50 проценти кошарка, 50 проценти бизнис, во Европа односот е 80 проценти кошарка и 20 проценти бизнис. НБА може да помогне во подобрувањето на тој однос“, рече поранешниот член на Денвер Нагетс.
Италијанецот, иако моментално работи како аналитичар, не ја исклучил можноста за соработка со НБА Европа во иднина.
„Би сакал. Не е лесно со оглед на тоа што сум во Америка, но размислувам за тоа. Би било одлично да имаме една или две италијански франшизи, во Рим и Милано. Миланo би бил уште подобар од очигледни причини“.
Галинари не е единствениот што ја даде својата поддршка на НБА Европа, бидејќи истото го направи и Пау Гасол.
„Европската кошарка има можност да продолжи да цвета. Европа има традиција и страст за кошарката, а ако на тоа го додадеме и ресурсот што го има НБА со структура и економски одржлив план, тогаш потенцијалот е огромен. Учествувам во разговорите, како медијатор, но мој приоритет е работата што ја работам сега, а тоа е со Меѓународниот олимписки комитет“, изјави поранешниот НБА ас за шпански АС.
