Селекторот на ракометната репрезентација на Македонија, Кирил Лазаров им честиташе на ракометарите за убедливиот триумф против Словачка од 15 гола разлика, и порача дека тоа „не се постигнува туку-така“.
„Мора да бидеме задоволни без разлика на нивото на ривалот Словачка. Презадоволен сум од пристапот на двата натпревара од сите играчи. Во претходните година и пол успеавме да составиме тим на играчи кои се борат еден за друг, дисциплинирани се, не е важно кој е најдобар важно е да победуваме. Се мачевме многу да дојдеме до ова, и сега мора да го задржиме тоа“, истакна Лазаров по мечот.
Истакна дека играчите растат со македонската лига, во нивните клубови, како и дека со квалитетни натпревари добиваат на искуство.
„Откако јас сум селектор, ова е шесто големо натпреварување во низа, со 99% променета генерација од претходно. Тој процес треба да се истрпи, а ние успеавме во тој период со стручниот штаб, со РФМ, со медиумите, да опстанеме на големата сцена и да создадеме производ кој ќе ја прави горда Македонија во следната деценија“, рече Лазаров.
