Минатата недела, тимот на Ред Бул официјално објави дека ќе се раздели со тркачкиот инженер на Макс Верстапен, Џанпјеро Ламбиазе, што ја става иднината на Холанѓанецот во „биковите“ под сериозно прашање.
Ламбиазе ќе го напушти Милтон Кинс за да се приклучи на Мекларен, каде што ќе ја преземе функцијата главен директор за трки, а тоа ќе се случи по завршувањето на сезоната 2027, кога ќе му истече договорот со Ред Бул.
А во интервју за RaceXpress, таткото на Верстапен, Јос, кажа каков е ставот на неговиот син за одлуката на Ламбиазе да се раздели од „биковите“.
„Знаевме веќе некое време, знаевме дека тоа ќе се случи. Сè уште имаме година и пол или две да работиме со него. Ова е добра можност за него, па го разбираме тоа. Му рековме да ја зграби оваа можност со двете раце. Понатаму, од Ред Бул зависи дали ќе го заменат. Ќе видиме“, рече сениорот Верстапен, јасно ставајќи до знаење дека тој и неговиот син ја поддржуваат одлуката на Ламбиазе.
