Селекторот на француската репрезентација, Дидие Дешан, ги сподели своите први зборови по победата од 2-0 над Мароко и пласманот на „петлите“ во полуфиналето на Светското првенство. Стручњакот коментираше за физичките проблеми во составот, промашениот пенал од Килијан Мбапе и уште еден голем успех за Франција на меѓународната сцена. Дешан изрази задоволство од упорноста на неговиот тим и смиреноста на неговиот капитен.
„Три полуфиналиња по ред, тоа е добро. Се чини логично и природно во однос на позадината на она што го покажавме. Не беше лесно да се стигне до тука. Пропуштивме шанси, пропуштивме пенал. Но, немаме сомнежи и сигурно сме во рамките на нашите можности. Точно сме таму каде што сакавме да бидеме пред почетокот на турнирот“, започна Дешан.
Селекторот, исто така, даде појаснување за состојбата на повредените играчи, како и за ротациите во составот.
„Килијан има мала повреда на глуждот и чувствуваше болка, Ману доби удар во коленото и имаше грчеви. Верувам дека ќе ги кренеме за следната фаза. Сите играчи мора да бидат подготвени во секој момент. Зборувавме за ова уште пред почетокот на турнирот“, додаде тој.
Тренерот заврши со коментар за атмосферата околу тимот и возбудата во неговата татковина.
„Фудбалот ја има оваа магија, тој е фабрика на емоции. Знаеме дека има многу страст кај нашите навивачи, сакаме да ги направиме среќни, да продолжиме напред и да им донесеме позитивни емоции на сите Французи. Сакаме да стигнеме што е можно подалеку. Повторно сме во полуфиналето, што е сериозно достигнување“, заклучи тренерот.
