Приказната за 32-годишниот бразилски футсал играч Брено Едувиге, попознат во спортскиот свет по прекарот Бренао, го воодушеви светот.
Човекот кој достигна нереална тежина од 251 килограм во најмрачните денови од неговата борба со депресијата, успеа да си го спаси животот, да изгуби повеќе од сто килограми и повторно да игра професионален футсал во дресот на славниот Ботафого.
Бренао отворено проговори за бразилските и шпанските медиуми за неговата мачна борба и нов почеток.
Проблемите со тежината го следеле уште од најраните денови, но вистинскиот колапс дошол со тешката ментална состојба.
„Во детството, моето засолниште беше топката, го поминував целиот ден на улица. Беше неверојатен период, а ми беше дијагностицирана депресија непосредно пред пандемијата. Кога се роди мојата прва ќерка, тежев 150 килограми. Една година подоцна, со раѓањето на мојата втора ќерка, тежев 180, а во 2020 година ја преминав границата од 200 килограми“, се сеќава Бренао.
„Престанав да тренирам за работа и да се посветам на моето семејство. Преку терапија, сфатив дека во мене останала огромна празнина поради загубата на мојот татко, кој почина кога имав само пет години. Без редовна психолошка помош, немаше да можам да се справам со јавното изложување и осудата на мојата околина. Дебелината порано не се третираше како болест, туку како небрежност – сите мислеа дека едноставно јадам премногу и не ми е гајле за себе.“
Кога вагата покажала повеќе од четвртина тон, паниката и стравот за сопствениот живот преовладале.
„Кога достигнав 251 килограм, не гледав излез. Мислев дека во секој момент во сон едноставно можам да престанам да дишам и никогаш повеќе да не се разбудам. Некои луѓе почнаа да зборуваат за мене како да сум веќе мртов. За среќа, не развив дијабетес или висок крвен притисок, а на крајот од 2023 година решив конечно да се посветам на моето здравје.“
Првиот чекор беше да се вратам на теренот со пријателите. Кога објави видео во кое го постигна победничкиот гол со 190 килограми две секунди пред крајот на натпреварот, снимката стана глобален хит на социјалните мрежи. Бренао сега има повеќе од милион следбеници на Инстаграм, каде што секојдневно ја документира својата неверојатна трансформација.
Неговото чудесно закрепнување го забележа Ботафого, кој му понуди договор и шанса во националното првенство.
„Досега ослабев 108 килограми, а моментално играм со 143 килограми. Мојата желба е да ослабам уште околу 50 килограми за да ја достигнам мојата идеална тежина, не сметајќи го вишокот кожа. Моето тело е навикнато на сосема различни движења со години и признавам дека се плашам од повреди. Само операцијата за отстранување на вишокот кожа дефинитивно ќе симне уште 15 килограми.“
Иако сонува за целосно професионално враќање, 32-годишниот Бразилец останува цврсто на земја.
„Ако не успеам целосно да се вратам на највисокото ниво на футсал, ќе бидам смирен. Верувам дека мојата мисија денес е многу поголема од самиот спорт. Мојата задача е да ја раскажам мојата приказна, да ги инспирирам луѓето кои се борат со истите демони и да им покажам дека никогаш не е предоцна да се започне одново“, заклучи Бренао.
