Ситуацијата на „Енфилд“ станува сè потензична, а се повеќе се зборува за можна промена на клупата на Ливерпул. Во центарот на приказната е Чаби Алонсо, кој наводно јасно стави до знаење под кои услови е подготвен да ги преземе „Црвените“.
Според шпанските медиуми, поранешниот играч од средниот ред на Ливерпул е подготвен да ја прифати понудата на клубот, но само ако го добие она што го смета за клучно за успех – три конкретни засилувања.
Пораката е јасна: нема договор без тоа.
Сегашниот тренер Арне Слот е под зголемен притисок по разочарувачките резултати, а нерешениот резултат против Тотенхем, тим кој се бори за опстанок, дополнително ја потресе атмосферата. Навивачите ги исвиркаа и играчите и тренерот по натпреварот, што е јасен знак дека трпението на „Енфилд“ е при крај.
Иако Слот ја донесе шампионската титула во својата прва сезона, ситуацијата во меѓувреме стана покомплицирана. Тој не потпиша нов договор, а ако остане следната сезона, би влегол во завршната фаза од сегашниот.
Во таков контекст, челниците на Ливерпул веќе бараат решенија – а Алонсо е едно од главните имиња на листата.
Шпанецот претходно беше кандидат за клупата на „црвените“ по заминувањето на Јирген Клоп, но тогаш одлучи да го прифати предизвикот во Реал Мадрид. Сега е повторно во игра, но под јасно дефинирани услови.
Клучот за сè е – тимот.
Алонсо сака засилувања во сите три линии. Одбраната, според достапните информации, е приоритет. Иднината на Ибрахима Конате е неизвесна, додека Вирџил ван Дајк се ближи кон крајот на својата кариера. Затоа Алонсо го гледа стоперот на Интер, Алесандро Бастони, како идеално решение.
Средниот ред, исто така, е во фокусот. Постои можност Алексис Мек Алистер да замине, а Алонсо го гледа Адам Вортон од Кристал Палас како засилување, играч кој се појави како едно од најинтересните млади имиња во Премиер лигата.
Третата желба се однесува на нападот. Мохамед Салах повеќе не е на нивото на кое беше во претходните сезони, додека Коди Гакпо сè уште не ги оправда целосно очекувањата по заминувањето на Луис Дијаз. Затоа Алонсо го сака напаѓачот на ПСЖ, Бредли Баркола.
Ливерпул веќе го обезбеди доаѓањето на младиот француски играч Жереми Жаке од Рен, но тоа очигледно не е доволно за амбициите на Алонсо.
Пораката затоа е многу јасна – ако Ливерпул го сака Чаби Алонсо на клупата, ќе мора да му обезбеди тим прилагоден на неговите потреби.
А тоа би можело да значи и почеток на нова ера на „Енфилд“.
