Менаџерот на Арсенал, Микел Артета, мирно го коментираше поразот од 2-0 од Манчестер Сити во финалето на Карабао Купот.
„Ме боли, особено поради нашите играчи и навивачите, бидејќи навистина сакавме да го освоиме овој трофеј. Видовме две сосема различни полувремиња. Во првото полувреме бевме подобриот тим и ги создадовме двете најчисти шанси во натпреварот. Не ги искористивме. Мораме да им признаеме на противниците за она што го направија. Многу тажен ден“, рече Артета.
На прашањето дали жали што го стави Кепа Аризабалага во игра, шпанскиот стручњак одговори: „Ја донесов одлуката пред натпреварот, врз основа на неговите перформанси во текот на целата сезона и фактот дека играше во ова натпреварување и ни помогна да стигнеме до тука. Ќе беше многу неправедно да избереме некој друг.“
Во врска со крајот на серијата без пораз на Арсенал, Артета додаде: „Имавме осум неверојатни месеци. Денес е разочарување. Треба да го искористиме тој оган во нас во текот на следните два месеци за да направиме една неверојатна сезона.“
