Денес во Минхен се одржа ждрепката за групната фаза на Светското првенство во ракомет во 2027 година, кое ќе се одржи во Германија од 13 до 31 јануари следната година.
Трите најдобри екипи од секоја група ќе се пласираат во втората фаза од натпреварувањето, по што ќе бидат формирани четири нови групи. Двете најдобри екипи од секоја група ќе ја продолжат борбата за медали во четвртфиналето.
Сите натпревари од нокаут фазата ќе се играат во Келн, во познатата „Ланксес Арена“, која ќе биде домаќин на четвртфиналето, полуфиналето и финалето. Четвртфиналето е закажано за 26 и 27 јануари, полуфиналето на 29 јануари, додека натпреварите за бронзен и златен медал ќе се играат на 31 јануари.
Македонската сениорска машка репрезентација ќе настапи во Групата Х, каде за противници ќе ги има селекциите на: Исланд, Бахреин и Јапонија.
This is how the story of the 2027 IHF Men's World Championship begins ⚡The preliminary round groups ⬇️#Germany2027 #wherehandballisalive pic.twitter.com/OMKHEdIgra
— International Handball Federation (@ihfhandball) June 10, 2026
Бранителот на титулата Данска е во групата Г заедно со Словенија, САД и Ангола.
Групи од првата фаза на Светското првенство 2027:
Група А (Минхен): Германија, Србија, Тунис, Уругвај
Група Б (Штутгарт): Египет, Италија, Зелен ’Рт, Саудиска Арабија
Група Ц (Минхен): Хрватска, Шпанија, Чиле, Турција
Група Д (Штутгарт): Аргентина, Франција, Бразил, Кувајт
Група Е (Кил): Шведска, Норвешка, Грција, Катар
Група Ф (Магдебург): Португалија, Фарски Острови, Полска, Алжир
Група Г (Кил): Данска, Словенија, САД, Ангола
Група Х (Магдебург): Исланд, Македонија, Бахреин, Јапонија
