Баерн Минхен започна преговори со офанзивниот играч на ПСВ Ајндховен, Исмаел Саибари, објави експертот за трансфери Фабрицио Романо.
Според информациите, Баварците имаат сериозен интерес за 25-годишниот марокански интернационалец, кој немал ништо против да им се придружи.
Саибари имаше одлична сезона за ПСВ, забележувајќи 19 гола и 9 асистенции во вкупно 37 натпревари за Холанѓаните, кои ја одбранија титулата во Ередивизи. Сосема логично, тој стана и играч на сезоната во холандското првенство.
Интересно, еден од головите на Мароканецот во текот на кампањата беше против Баерн – во поразот на Холанѓаните со 1:2 од баварскиот гигант во Лигата на шампионите.
Саибари најчесто се користи како офанзивен играч од средниот ред, но може да игра и како лево крило и напаѓач, и токму оваа разноврсност го привлече вниманието на германскиот хегемон. Сè уште не е јасно колку би барал ПСВ за играчот, но се очекува неговата цена да биде најмалку 50 милиони евра.
