Поранешниот тренер на Манчестер Јунајтед, Ерик тен Хаг, во ексклузивно интервју за „Атлетик“ зборуваше за судирот со Кристијано Роналдо што го одбележа неговиот престој на „Олд Трафорд“.
Холандскиот стручњак вели дека сериозно размислувал за Португалецот и дека пред да дојде во Јунајтед отпатувал во Португалија за да разговара со него за своите планови.
„Го разочара тимот и ме разочара мене, бидејќи имавме планови со него. Летав во Португалија за да разговарам со него за тоа што сакав да постигнам пред да дојдам во Јунајтед. Секако, тој е еден од најдобрите во историјата на фудбалот и многу го почитував. Но, потоа, како тренер, морав да донесам рационална одлука“, рече Тен Хаг.
Тој исто така тврди дека Роналдо не тренирал како што треба.
„Тој не беше способен за тоа. Не трчаше кога ја имавме топката или кога ја немавме. Причината е што не се подготвуваше. Секој голем тим мора да прифати врвен играч, но врвен играч мора да работи за тимот. Им велеше на играчите: „Чувајте си ги нозете на тренинг“. Го разбирам тоа кога си во врвна форма, но прво мора да тренираш за да ја достигнеш вистинската физичка кондиција“, рече Тен Хаг.
„Атлетик“ го контактираше претставникот на Роналдо по овие изјави, но до моментот на објавување немаше одговор.
Односот меѓу Тен Хаг и Роналдо се распадна есента 2022 година. Роналдо одби да влезе како замена во победата над Тотенхем (2-0) и го напушти стадионот пред крајот, поради што беше суспендиран. Кратко потоа, во интервју со Пирс Морган, тој рече дека се чувствува предаден од клубот и дека не го почитува Тен Хаг затоа што тренерот не го почитувал ниту него. После тоа, Јунајтед меѓусебно го раскина договорот на Роналдо, кој потоа се пресели во Ал-Наср од Саудиска Арабија.
Тен Хаг претходно претежно избегнуваше остри зборови за Португалецот. Минатото лето, додека беше тренер на Баер Леверкузен, изјави дека Роналдо никогаш не му претставувал проблем и дека му посакува се најдобро.
