Новиот менаџер на Ливерпул, Андони Ираола, изјави дека сака играчот од средниот ред Алексис Мекалистер и голманот Алисон Бекер да останат во клубот. Двајцата играа за Аргентина и Бразил на Светското првенство во 2026 година.
На аргентинскиот репрезентативец Мекалистер му остануваат уште две години од петгодишниот договор што го потпиша со „Црвените“ кога пристигна во 2023 година. 27-годишниот фудбалер сè уште не започнал преговори за нов договор, што предизвика шпекулации дека би можел да го напушти „Енфилд“ ова лето. Бразилскиот голман, пак, беше поврзуван со голем број клубови, вклучувајќи го и Јувентус.
Сепак, зборувајќи на прес-конференција во Чикаго на почетокот од предсезонската турнеја на Ливерпул во САД, Ираола рече дека сака да ги задржи играчите.
„Мислам дека Алексис беше еден од најдобрите играчи во клубот во последните неколку години и имаше многу добро Светско првенство, па затоа е нормално што другите клубови ги сакаат нашите најдобри играчи“, рече Ираола. „Секогаш се случува на трансфер пазарот. Но, сакам да ги задржам моите добри играчи“, додаде Шпанецот.
Алисон има уште една година од договорот на „Енфилд“, но Ираола е решен да се потпре на искуството на 33-годишниот Бразилец во претстојната сезона.
„Многу сум задоволен од ситуацијата што ја имаме во моментов на голманската позиција. Алисон е некој кој, во соблекувална која изгуби дел од своето искуство, дефинитивно ќе ни помогне во процесот на адаптација на новите засилувања и младите играчи. Потребни ни се лидери како Вирџил ван Дајк, како Алисон, како Џо Гомез – играчи кои се тука долго време“, објасни новиот менаџер на Ливерпул.
Ираола призна дека размислува да доведе засилувања во одбраната за време на летниот преоден рок, особено на десната бековска позиција, со оглед на тоа што Конор Бредли е „месеци“ далеку од враќање во акција. Репрезентативецот на Северна Ирска претрпе повреда на коленото во јануари и нема да биде достапен за почетокот на сезоната.
„На крајот на краиштата, ако го имавме Конор Бредли целосно подготвен и во форма, ќе бевме многу среќни и немаше да ги поставуваме овие прашања“, објасни Шпанецот.
„Мислам дека ситуацијата е комплицирана бидејќи веруваме во Конор на долг рок, знаеме дека сакаме да биде наш десен бек, но во моментов би рекол дека е сè уште малку далеку од враќање. Значи, со ситуацијата со централниот бек и десниот бек, во однос на длабочината во одбраната, мислам дека сме многу ограничени во моментов, па да, тоа е решение што се обидуваме да го најдеме. Дефинитивно ни треба и крилен напаѓач, но зависи од многу работи, состојбата на пазарот и други работи“, додаде Ираола.
