Вардар и ФК Рига синоќа одиграа ефикасен натпревар во квалификациите за Конференциската лига. Гостите од Латвија забележаа успех од 3:2 и ги зголемија своите шанси за пласман во следната рунда.
Вардар поведе во 28-та минута со голот на Диего Кастанеда, но гостите го свртеа резултатот пред полувремето со головите на Орландо Гало (35′) и Јаго Сикеира (39′).
Во 66-та минута, новото засилување на „црвено-црните“, Герсон Родригез, го врати изедначувањето. Репрезентативецот на Луксембург постигна гол по асистенција од искусниот Горан Закариќ.
Последниот збор му припадна на ФК Рига. Во 81-та минута, Андрес Салазар брзо се проби и му додаде на резервистот Реџиналдо Рамирез, кој го обликуваше конечниот резултат.
