Реал Мадрид поминува низ една од најтурбулентните фази во поновата историја. Сезона без трофеј, втора по ред, е сама по себе алармантна за клуб со таков углед, но она што сега излегува на виделина укажува на многу подлабок проблем – целосен распад на авторитетот во соблекувалната.
Додека резултатите се во надолна линија, од Мадрид доаѓаат информации што беа незамисливи до неодамна. Според шпанските медиуми, некои од играчите одбиле да патуваат на првенствениот натпревар против Селта Виго на почетокот на март, што предизвикало паника во клубот.
Според достапните информации, дури четворица фудбалери не сакале да одат со тимот на гостувањето. Меѓу нив беа Едуардо Камавинга, Дани Карвахал, Раул Асенсио и Алваро Карерас.
„Камавинга, Раул Асенсио и уште двајца играчи одбија да патуваат во Виго. Клубот мораше да интервенира и да ја реши ситуацијата“, вели новинарот Пепе Алварез.
Подоцна беше откриено дека Камавинга и Карерас имале одредени изговори – Французинот поради тешко воспаление на забите, а шпанскиот дефанзивец поради суспензија. Но, причините зошто Карвахал и Асенсио не сакале да патуваат останаа нејасни.
Интересно е што тренерот Алваро Арбелоа веќе даде изјава по тој натпревар, што денес звучи како јасна порака одвнатре.
„Многу сум среќен за момците кои сакаа да дојдат тука“, рече тој во тоа време.
Дури сега станува јасно колку всушност била значајна таа реченица.
Овој развој на настаните дополнително потврдува дека проблемите во Реал не се поврзани само со резултатите. Се повеќе се зборува за нарушената хиерархија, слаб авторитет и фактот дека дел од играчите повеќе не ја чувствуваат тежината на дресот на начинот на кој тоа беше случај во претходните генерации.
Навивачите се незадоволни веќе долго време, а ваквите информации само го продлабочуваат јазот помеѓу тимот и трибините.
Сè укажува на фактот дека летото на „Сантијаго Бернабеу“ ќе донесе големи промени. Се споменува заминување на голем број играчи, додека потрагата по нов тренер е веќе во тек.
Клубот е свесен дека е потребно ресетирање – не само во однос на персоналот, туку и во воспоставувањето дисциплина и јасна структура во соблекувалната. Реал Мадрид низ историјата поминал низ кризи, но вакви сцени – играчите да одбиваат да ги исполнат основните обврски – ретко се гледаат.
