Посетата на Александар Чеферин е вистинска потврда на нашето пријателство и искрениот однос што го имаме со раководството на УЕФА. За нас е особено важно што во изминатата година спроведовме сериозни реформи во повеќе сегменти, од структурни и организациски промени, преку подобрување на инфраструктурата, до јасна стратегија за развој на младинскиот фудбал, изјави претседателот на Фудбалската федерација на Македонија, Масар Омерагиќ за претседателот на УЕФА, кој денеска престојува во официјална посета на Фудбалската федерација.
Додава дека споделени се вредни информации за состојбите во фудбалот во Македонија и регионот и отворено се разговарало за клучни теми.
„Оваа поддршка и разбирање од УЕФА е силен поттик да продолжиме со реформите и да го развиваме македонскиот фудбал на највисоко можно ниво“, изјави Омерагиќ.
Според него, Чеферин со знаење, храброст и одлучност го води европскиот фудбал низ големи предизвици во изминатите години и уверен е дека и понатаму, на ист начин како досега, ќе го штити и развива европскиот фудбал.
„Се покажа како личност која е способна истовремено комерцијално да ги развива елитните натпреварувања на УЕФА, од Лигата на шампионите до Европското првенство, а истовремено да ја чува базата и да инвестира во развојот на фудбалот низ цела Европа. Горди сме на одличната соработка на нашата федерација со УЕФА“, истакна Омерагиќ.
Заедно со првиот човек на европскиот фудбал, во делегацијата се и Зоран Лаковиќ, директор за национални асоцијации во УЕФА, како и Денис Бастари, раководител за развој на национални асоцијации во УЕФА.
