Иднината на Мохамед Салах останува неизвесна. Иако некои турски медиуми во петокот тврдеа дека египетскиот ас постигнал договор со Бешикташ, неговиот агент Рами Абас ги негираше таквите информации.
Салах моментално е на одмор по завршувањето на Светското првенство, каде што беше елиминиран со египетската репрезентација во осминафиналето по поразот од Аргентина (3:2). Во исто време, неговиот договор со Ливерпул истече, со што заврши деветгодишната ера на „Енфилд“.
Агентот на еден од најдобрите африкански фудбалери на сите времиња изјави дека одлука за нов клуб сè уште не е донесена.
„Сè уште не знаеме каде ќе игра Мохамед Салах следната сезона, но можно е да дознаеме многу наскоро“, напиша Абас на социјалната мрежа X.
Во друга објава, тој дополнително ги негираше приказните за преговори со клубови каде што Салах не сака да игра.
„Не е наш стил да преговараме со клубови во кои Мохамед не сака да оди само за да добие медиумско внимание“, рече тој.
Гласините за трансфер во Бешикташ се засилија кога навивачите на истанбулскиот клуб го скандираа името на Салах за време на презентацијата на Леандро Тросард. Пред турската опција, најзборуваната опција беше трансфер во МЛС, каде што Спортинг Канзас Сити наводно покажува најголем интерес.
Саудиските Ал-Хилал и Ал-Кадисија се уште се меѓу кандидатите за неговиот потпис, но некои медиуми тврдат дека финансиските барања на Салах се превисоки за двата клуба.
Сепак, извори во Турција продолжуваат да наведуваат дека Египќанецот е подготвен да ги намали очекувањата за да игра за Бешикташ. Според овие информации, на маса е едногодишен договор со можност за продолжување за уште една сезона, со годишна плата од околу 10 милиони евра, плус бонуси.
