Францускиот кошаркарски клуб Бург беше една од најубавите кошаркарски приказни во Европа минатата сезона, во која успеа да ја освои титулата во Еврокупот.
Така, Бург обезбеди и место во Евролигата следната сезона, но претседателот на клубот, Жилиен Дебот, во неодамнешно интервју објави дека Бург сепак нема да игра во елитното натпреварување.
Конечната потврда дојде во денешното соопштение на клубот.
„Бург го достигна врвот на своето патување со освојувањето на трофејот во Еврокупот на 28 април. По овој успех, клубот внимателно ја истражи можноста за приклучување кон Евролигата. Дискусиите опфаќаа финансиски, организациски и структурни фактори. Сфативме дека не можеме да го направиме овој чекор, бидејќи тоа би ги загрозило темелите што беа поставени одамна. По проценката, одлуката беше донесена во согласност со Евролигата“, се вели во соопштението на Бург.
Ве потсетуваме дека шпанската Гран Канарија направи идентичен чекор во 2023 година, кога исто така се повлече од Евролигата како победник на Еврокупот.
