Грчката кошарка е потресена од голем скандал откако, според локалните медиуми, се издадени потерници за претседателот на Кошаркарската федерација Вангелис Лиолиос и уште пет лица, под сомнение за местење натпревари.
Покрај првиот човек на грчката кошарка, издадени се потерници и за уште пет спортски работници, од кои двајца се активни судии, а останатите се функционери на Федерацијата.
Според достапните информации, обвинителот и истражниот судија процениле дека постои ризик Лиолиос да избега, поради што е издадена потерница против него.
Весникот наведува дека сè укажува дека сето ова дошло по сведочења, извештаи и доставување писмени пораки од спортски функционери и судии, кои ги потврдуваат обвинувањата за местење натпревари.
