Светскиот број еден, Карлос Алкараз, го освои АТП турнирот во Доха по импресивно финале. Шпанскиот тенисер го победи Французинот Артур Филс со 6-2, 6-1 за само 50 минути и го освои трофејот, потврдувајќи ја својата врвна форма на почетокот на сезоната.
Ова беше само втор турнир за Алкараз во 2026 година и негова втора титула. Претходно триумфираше на Отвореното првенство на Австралија, каде што го освои трофејот со седум победи, додека во Доха забележа пет триумфи.
Оваа сезона одигра вкупно 12 натпревари и постигна максимален учинок. Со оваа титула, тој стигна до 26-от трофеј во кариерата, дополнително зацврстувајќи го својот статус на најдобар тенисер во светот.
Од друга страна, 21-годишниот Филс, под водство на својот нов тренер, легендарниот Горан Иванишевиќ, стигна до своето прво финале од есента 2024 година, кога ја освои својата втора АТП титула во Токио.
Сепак, ќе мора да почека за третиот трофеј во кариерата.
