Казахстанската тенисерка Елена Рибакина (бр. 5 на ВТА) го освои Австралија Опен откако ја победи Арина Сабаленка (Бр. 1 на ВТА) во финалето во Мелбурн со резултат од 2:1 во сетови (6:4, 4:6, 6:4).
Нивниот дуел беше реприза на финалето од 2023 година, а сега Рибакина ја освои титулата по драматичен и одличен камбек во третиот сет.
Од почетокот на натпреварот, Рибакина наметна силно темпо. На првиот сервис на Сабаленка, таа веднаш направи брејк, а потоа го освои својот сервис без да изгуби поен, потврдувајќи ја својата доминација во првиот сет.
Сабаленка погоди неколку аса, но Рибакина остана цврста и не ѝ дозволи ниту сантиметар простор на противничката.
Во вториот сет видовме израмнета борба. Двете тенисерки безбедно го држеа својот сервис до 10-тиот гем, кога Рибакина сервираше за да остане во сетот и не можеше да го издржи притисокот.
Сабаленка направи брејк со „нула“ за да го израмни сетот на 1:1.
Белорусинката направи брејк на почетокот на третиот сет и водеше со 3:0, а се чинеше дека мирно ќе го доведе мечот до крај, со оглед на тоа што беше во подем, но потоа се случи неверојатен пресврт на настаните.
Рибакина освои пет последователни гема, а победи со 6:4.
Ова е втората Гренд слем титула на Рибакина во нејзината кариера, откако претходно го освои Вимблдон во 2022 година.
Од друга страна, Сабаленка остана со две титули во Мелбурн, но ова беше нејзин втор последователен пораз во финалето. Покрај двете титули во Мелбурн, Сабаленка е и двократна шампионка на Отвореното првенство на САД.
Фото: Јутјуб/Принтскрин/Australian Open
