Италијанскиот печат традиционално се однесува остро кон својот омилен тим од Формула 1 – Ферари, но по неуспешното Гран При на Италија за Скудерија, реакциите се уште поостри.
Најтиражниот весник во земјата – „Кориере дела Сера“ дури го употреби англискиот збор за неуспех – flop, за да го опише настапот на Ферари во Монца.
Анализата посветена на неделната трка опишува дека големите шефови на Ферари, Џон Елкан и Бенедето Виња, се свесни за тешкиот период низ кој минува тимот, но тешко дека очекувале таков неуспех. Секако, зборуваме за инцидентот помеѓу Шарл Леклер и Луис Хамилтон во првата шикана и судирот со ѕидот на Леклер малку подоцна.
Исто така, промените на моторот на Ферари не го дадоа очекуваниот резултат и по трката, шефот на тимот Фредерик Васер објасни дека повеќе не може да продолжи вака.
„Лицето на Васер ја изгуби таа насмевка што порано ги нервираше сите во непријатни моменти“, се вели во статијата.
„Фред е свесен дека и покрај неодамна продолжениот договор, неговата иднина на чело на тимот е сè уште под знак прашалник. Сите во Маранело се под сериозен притисок, притисокот доаѓа од врвниот менаџмент на компанијата и како резултат на тоа, може да дојдат оставки. Но, не веднаш, ќе биде потребна подготовка. Но, Монца би можела да биде катализатор што ќе доведе до процес на трансформација.“, велат од „Кориере дела Сера“.
