Организаторите на Големата награда на Австралија изјавија дека се „многу уверени“ дека моменталниот хаос во воздушниот сообраќај предизвикан од конфликтот на Блискиот Исток нема да влијае на отворањето на новата сезона во Формула 1 овој викенд во Мелбурн.
Речиси 1.000 вработени во Ф1 мораа да ги променат своите планови за патување, додека се очекува околу 500 да пристигнат од Европа со чартер летови.
Прекините доаѓаат по нападите на САД и Израел врз Иран, како и одмаздничките напади низ регионот, кои ги погодија клучните воздушни рути преку Катар и Обединетите Арапски Емирати.
Шефот на австралиската Формула 1, Травис Олд, изјави дека „сите ќе бидат подготвени да се тркаат“ додека Мелбурн се подготвува за почетокот на сезоната 2026.
„Последните 48 часа бараа одредено презакажување на летовите. Тоа е одговорност на Формула 1, која се грижи за тимовите, возачите и целиот потребен персонал. Колку што знам, сè е сега решено и сите ќе бидат тука на време – навивачите нема да забележат никаква разлика“, рече Олд.
Според него, три чартер авиони ќе превезат околу 500 членови на караванот на Ф1 од Европа.
„Целата опрема веќе пристигна и е подготвена. Уверени сме дека нема да има никакво влијание“, додаде тој.
Формула 1 соопшти дека „внимателно ја следи ситуацијата“, но потсети дека следните три трки – во Австралија, Кина и Јапонија – се надвор од Блискиот Исток.
Дури потоа ќе следат трките во Бахреин (12 април) и Саудиска Арабија (19 април).
„Како и секогаш, внимателно ја следиме ситуацијата и тесно соработуваме со надлежните органи“, се вели во соопштението на Ф1.
Олд додаде дека организаторите однапред размислуваат за можните последици врз календарот на натпреварите, но дека во овој момент нема проблеми за трката во Мелбурн.
Затоа, отворањето на сезоната на патеката Алберт Парк, и покрај глобалните предизвици, треба да се одржи без организациски тешкотии.
Првата трка од новата сезона во Ф1 е во недела во 5 часот наутро по наше време.
