Без разлика дали се приближува до 1.000 голови во кариерата или сè уште игра на врвно ниво по повеќе од две децении професионален фудбал, Кристијано Роналдо долго време ги поместува границите кога станува збор за долговечност во спортот.
Легендата на Португлија можеби сега покажа зошто толку долго трае на врвот, со фотографија од неговата импресивна фигура. Во објава до своите следбеници на Инстаграм, Роналдо рече:
„Долговечноста и високите перформанси не се случуваат случајно. Тие се градат преку секојдневно, практично закрепнување. Тоа не е тајна. Тоа е рутина“.
Држејќи нешто што наликува на пиштол за масажа од неговата линија производи за опоравување AVACR7, напаѓачот на Ал-Наср позираше во своите препознатливи црни боксерки, покажувајќи ги своите извајани стомачни мускули.
Роналдо е познат по тоа што тренира до четири часа на ден и консумира шест помали оброци богати со протеини за да остане во врвна форма. Тој исто така редовно користи сауни и ледени бањи за да му помогнат да се опорави побрзо.
Според најновите мерења, процентот на неговите телесни масти е неверојатни седум проценти, додека од играчите од Премиер лигата обично се очекува да одржуваат ниво помеѓу осум и 12 проценти.
Покрај клупскиот тренинг, Роналдо има и лична програма за вежбање. Редовно вежба пилатес и пливање и оди во теретана пет пати неделно. Неговите тренинзи вклучуваат 25 до 30 минути кардио, спринтови со висок интензитет и целни вежби за сила.
Наместо класичните три оброци на ден, Роналдо практикува шест оброци, појадок, бранч, ручек, ужина и вечера, распоредени така што неговото тело постојано се снабдува со енергија.
Неговата исхрана често вклучува авокадо, свежа риба и посни протеини како пилешко. Тој редовно јаде салата, интегрални житарки како киноа и свежо овошје.
Репрезентацијата на Португалија откри дека едно од омилените јадења на нивниот капитен е Бакалау а Брас, традиционално јадење направено од кајгана, пржени компири и солен бакалар.
Поранешната ѕвезда на Реал Мадрид, Манчестер Јунајтед и Јувентус сега заработува околу 570.000 евра дневно во Саудиска Арабија, што го прави еден од најплатените спортисти во светот.
Сепак, неодамна се најде во центарот на шпекулациите откако пропушти три натпревари. Се вели дека бил незадоволен од поддршката на инвестицискиот фонд ПИФ кога станува збор за трансфери за неговиот клуб во споредба со неговите ривали.
Ова покрена прашања за неговата иднина во лигата, но Роналдо се обиде да ја смири ситуацијата откако се врати на теренот.
„Многу сум среќен. Како што реков многу пати, јас припаѓам на Саудиска Арабија. Оваа земја ме пречека мене, моето семејство и моите пријатели на најдобар начин. Среќен сум тука и сакам да останам“, рече Роналдо, а потоа додаде: „Нашата работа е да победуваме и да вршиме притисок врз нашите ривали во борбата за титулата. Одиме натпревар по натпревар. Во добра форма сме и ќе видиме што ќе се случи.“
Едно е сигурно, годините се уште се само бројка за Кристијано Роналдо.
