Лил неодамна се раздели со Бруно Џенезио и веќе се договори за нов тренер. Како што објави „Л’Екип“, Давиде Анчелоти ќе го преземе францускиот тим.
Младиот италијански стручњак (37) и син на славниот Карло постигна договор со челниците на францускиот клуб, а претседателот Оливие Летанг брзо реагираше за да го обезбеди неговиот потпис пред претстојните предизвици во Лигата на шампионите.
Џенезио го напушти клубот во понеделник откако не му беше продолжен договорот, иако го водеше Лил до третото место во Лига 1 и обезбеди место во лигашката фаза од елитното натпреварување.
По ова заминување, францускиот стратег сериозно се поврзува со преземање на Олимпик Марсеј.
За Анчелоти јуниор, ова ќе биде втор независен мандат на клупа на првиот тим, откако претходно неколку месеци го водеше бразилскиот Ботафого.
