Кошаркарскиот клуб Арис од Солун официјално го потврди доаѓањето на македонскиот репрезентативец Ненад Димитријевиќ. Популарниот Нено потпиша двегодишен договор со челниците на грчкиот клуб.
Тој пристигнува во Солун како еден од главните кошаркари во амбициозниот проект за враќање во Евролигата, под водство на новиот тренер Василис Спанулис.
„Арис со задоволство го објавува потпишувањето на Ненад Димитријевиќ за следните две години. Играчот пристигна од руски Зенит, со кого имаше важечки договор“, се вели во официјалното соопштение.
Димитријевиќ ја започна минатата сезона во Зенит, но ја заврши на позајмица во Баерн Минхен.
Одигра 16 натпревари во Евролигата за германскиот тим, со просек од 11 поени, 2,3 скока и 4,1 асистенции, со 54 проценти прецизност од шут за три поени.
Димитријевиќ, роден во Скопјe, е висок 190 сантиметри и игра како плејмејкер. Покрај Зенит и Баерн, во текот на својата кариера играше за Хувентуд, Валенсија, Уникс и Олимпија Милано.
