Менаџерот на Фулам, Алваро Арбелоа, изјави дека вниманието на јавноста не треба да биде насочено кон него, туку кон клубот, играчите и навивачите, бидејќи лондонскиот тим се обидува да ја запише својата прва победа во сезоната во Премиер лигата.
Фулам е последен на табелата со два бода, откако забележа четири порази и две нерешени резултати во првите шест натпревари, поради што 43-годишниот шпански стручњак е под притисок.
Иако постојат шпекулации дека уште еден пораз би можел да доведе до негово отпуштање, Арбелоа рече дека имал „нормална недела“, објави Би-Би-Си.
„Не станува збор за мене, туку за клубот, играчите и навивачите“, рече Арбелоа.
Фулам ќе го пречека Хал во недела во 16 часот, во обид да постигне прв триумф во шампионатот во сезоната.
Лондонскиот тим беше на дофат од победа против Ипсвич минатиот викенд откако Рајан Сесењон го доведе Фулам во водство во второто полувреме. Сепак, домашните примија два гола во последните минути и останаа без бодови.
Слично сценарио беше видено и на дуелот против Манчестер Јунајтед, пред паузата за репрезентативни натпревари, кога Фулам беше блиску до освојување на сите три бода, но примија гол во последните минути за резултат од 1-1.
„Не станува збор за мојата иднина. Како што реков, станува збор за клубот и моите играчи. Тие сакаат да бидат наградени за своите напори и да играат натпревар во кој ќе победат за навивачите. Тие го заслужуваат тоа поради поддршката што ни ја даваат. Тоа е важно за сите нас“, рече Арбелоа.
Шпанскиот тренер го презеде Фулам ова лето, потпишувајќи тригодишен договор, откако го наследи Марко Силва на клупата. Пред да дојде во Англија, тој кратко беше привремен тренер на Реал Мадрид.
Зборувајќи за тоа дали верува дека играчите ги поддржуваат неговите идеи и се подготвени да ги спроведат на теренот, Арбелоа рече дека тие веќе го покажале тоа во претходните натпревари.
„Тоа го правеа поголемиот дел од натпреварот против Ипсвич. Истото го видовме и против Манчестер Јунајтед и Ливерпул, кога игравме 0-0 на Енфилд. Мора да се обидеме да го одржиме тоа ниво на игра во текот на сите 90 минути. Тоа е важно“, рече тренерот на Фулам.
Тој додаде дека е уверен во посветеноста на своите играчи, што, како што изјави, е потврдено со нивниот пристап кон тренинзите и подготовките за следниот натпревар.
„Видов колку се посветени играчите преку начинот на кој тренираат. Тие се целосно фокусирани на утрешниот натпревар“, заклучи Арбелоа.
