За потенцијалното заминување на Пеп Гвардиола од Манчестер Сити се шпекулира веќе некое време. Сега гласините добија на интензитет бидејќи двајца од помошниците на шпанскиот тренер треба да ја напуштат Англија на крајот од сезоната.
Тренерот за физичка подготвеност Лоренцо Бонавентура работеше со Гвардиола во Барселона и Баерн Минхен, а сега и во Манчестер Сити. Сепак, 63-годишникот ќе го напушти „Етихад“ ова лето. Ќе му се придружи тренерот на голманите Чаби Мансидор, кој веќе беше дел од Манчестер Сити кога Гвардиола пристигна во Англија во 2016 година.
Ова дефинитивно ќе биде голем удар за Сити, но и загриженост за навивачите на клубот. Сите се надеваат дека Гвардиола ќе остане и ќе ја одработи последната година од договорот, но никој не може да каже со сигурност во моментов. Дури и самиот Шпанец неколку пати ги избегнуваше прашањата за неговиот статус за следната сезона.
Ова нема да бидат единствените заминувања од „Етихад“ ова лето. Клубот официјално потврди дека Бернардо Силва ќе го напушти Сити, додека медиумите исто така објавуваат дека договорот на Џон Стоунс нема да биде продолжен. Англичанецот на тој начин ќе ги следи стапките на португалскиот играч од средниот ред.
Извори блиски до клубот велат дека Енцо Мареска е првата и единствена опција во случај Гвардиола да одлучи да ги напушти „граѓаните“ по една деценија на клупата. Мареска веќе работеше како помошник на Пеп и добро го познава системот воспоставен во Манчестер.
