По неколку дена одмор, тимот на Барселона се врати на тренинзи во понеделникот во спортскиот комплекс „Жоан Гампер“. Тренингот се одржа без репрезентативците, кои се со своите тимови низ целиот свет, но со Алехандро Балде, Жил Кунде и Френки де Јонг, кои се во последната фаза од закрепнувањето.
Се очекува првите двајца да бидат подготвени за тешкиот натпревар на гостински терен на „Метрополитано“ против Атлетико Мадрид во сабота, што би било добро засилување за крилата на одбраната.
Присуството на холандскиот играч од средниот ред во лигашкиот натпревар против Атлетико, сепак, е помалку веројатно. Токму против „јорганџиите“, во реваншот од четвртфиналето на Кралскиот куп, Балде заработи повреда на дисталниот бицепс феморис на левата бутина, а Кунде – на средната третина од бицепсот на левата бутина. Де Јонг се повреди на тренинг на 26 февруари, заработувајќи повреда на тетивата на десната нога.
Во меѓувреме, се очекува Рафиња наскоро да пристигне во Барселона за да се подложи на тестови за да се утврди неговиот третман откако претрпе повреда на тетивата на десната нога за време на натпреварот против Бразил. Бразилското крило ќе отсуствува околу пет недели.
Другиот повреден играч во составот е Данецот Андреас Кристенсен, кој е речиси еден месец пред враќање по делумно кинење на предниот вкрстен лигамент на левото колено, кое го претрпе кон крајот на декември.
