Поранешниот претседател на Италијанскиот олимписки комитет Џовани Малаго и Џанкарло Абете, претседател на Аматерските фудбалски лиги, сега се официјално кандидати за нов претседател на Италијанската фудбалска федерација.
Италијанската фудбалска федерација има рок до 22 мај да ги прифати овие кандидатури, но според „Газета дело Спорт“, ова ќе биде само формалност.
Изборите за нов претседател на Италијанската фудбалска федерација ќе се одржат на 22 јуни.
Според италијанските медиуми, Малаго ќе добие мнозинство гласови. Поранешниот шеф на Олимпискиот комитет веќе ја има поддршката од Серија А, здружението на играчи и здружението на тренери, а синоќа беше потврдено дека ја има и поддршката од Серија Б.
Абете моментално е претседател на Аматерските лиги и ќе ја има нивната поддршка.
Серија А ќе има 20 делегати на изборите, или 18 проценти од гласовите, Серија Б исто така 20 делегати и шест проценти од гласовите, а Серија Ц 57 делегати и 12 проценти од гласовите. Аматерските лиги ќе имаат дури 99 делегати, или 34 проценти од гласовите, додека здружението на играчи има 20, а здружението на тренери има десет проценти од гласовите.
Поранешниот претседател на Италијанската фудбалска федерација, Габриеле Гравина, поднесе оставка на почетокот на април под политички притисок откако националниот тим не успеа да се квалификува на Светското првенство по трет пат по ред.
