Менаџерот на Манчестер Сити, Пеп Гвардиола, не го криеше своето задоволство по интензивниот судир со Њукасл, кој им го запечати билетот на „граѓаните“ за финалето на „Карабао Купот“.
„Граѓаните“ победија со 3-1 и закажаа средба со Арсенал на „Вембли“. Ова е петто финале за клубот во последните десет години на турнирот. Менаџерот не штедеше пофалби за голманот Џејмс Трафорд, кој се истакна со неколку одлични одбрани.
„Против Њукасл никогаш не можете да имате целосна контрола. Џејмс беше неверојатен, особено во ситуациите „еден на еден“ во првото полувреме. Тој е врвен голман со неверојатна иднина и дефинитивно ќе игра во своето прво големо финале“, рече Каталонецот.
„Во март повторно патуваме во Лондон. Арсенал ќе нè чека таму – тие никогаш не патуваат на север за финалиња, но среќен сум што се враќаме таму. Пет финалиња за десет години се голема пресвртница за овој клуб“, рече Гвардиола.
Омар Мармуш доби пофалби за неговата тактичка дисциплина и голгетерски вештини.
„Неговите движења зад одбраната и неговиот инстинкт пред голот се на највисоко ниво. Среќен сум за него бидејќи овие натпревари се ментално тешки, но тој заврши одлична работа“, додаде Пеп.
За многу од играчите во сегашниот состав, ова ќе биде шанса да го освојат својот прв трофеј во синиот дрес. Според Гвардиола, „Карабао Купот“ честопати бил појдовна точка за успесите на Сити.
„Нашиот прв трофеј тука беше на овој турнир. Успехот раѓа вкус за повеќе победи. Имаме судир со Арсенал – веројатно најдобриот тим во Европа и светот во моментов“, заклучи менаџерот.
Фото: Јутјуб/Принтскрин/ЕСПН
