Напаѓачот на Наполи, Расмус Хојлунд, кој е позајмен од Манчестер Јунајтед до крајот на сезоната, ги сподели своите впечатоци од работата под водство на поранешниот тренер на „црвените ѓаволи“, Рубен Аморим.
„Го добив она што го сакав од мојот трансфер во Наполи. Во еден момент се чувствував како сè да е завршено за мене во Манчестер Јунајтед. Во Наполи повторно се заљубив во фудбалот. Дури и во Данска почнаа да ме отпишуваат, но не престанав да верувам во себе“, рече Хојлунд во интервју за TV2.
„Сега играм за тим и клуб каде што веруваат во мене. Тука има спортски директор, претседател и тренер кои сакаат да работат со мене. На крајот од мојот престој во Манчестер се чувствував како затвореник. Разбрав дека ако работите продолжат вака, фудбалот нема да има големо присуство во мојот живот“, беше искрен Хојлунд.
Наполи веќе објави дека има намера да ги купи правата на Данецот од Манчестер Јунајтед, без оглед на тоа дали тимот ќе се квалификува за Лигата на шампионите.
