Хари Кејн повторно се претвори во кошмар за Реал Мадрид и постигна гол против „белиот балет“ во победата на неговиот Баерн Минхен од 4:3 во реваншот од четвртфиналето на Лигата на шампионите. Баварците се пласираа во завршната четворка на најпрестижниот европски клупски турнир, откако го добија првиот натпревар со 2:1 и се пласираа понатаму со вкупен резултат од 6:4.
„Беше тежок натпревар. Знаевме дека ќе биде тешко против Реал Мадрид во Лигата на шампионите. Очигледно е дека тие имаат посебна врска со ова натпреварување и мора да бидете на највисоко ниво за да ги победите и елиминирате.
Првото полувреме беше лудо, очигледно почнавме на најлош можен начин, но се вративме и изгледавме како поопасен тим, но нивните играчи во транзиција навистина можат да повредат и тоа нè казни.
Во второто полувреме си рековме дека мора да бидеме малку потрпеливи. Знаевме дека ќе станеме посилни како што одминуваше натпреварот и успеавме да ги реализираме нашите шанси кон крајот“, рече Кејн.
