Баерн Минхен би можел да биде без тренерот Винсент Компани на клупата за утрешниот натпревар од Лигата на шампионите против Арсенал, бидејќи белгискиот стручњак веќе неколку дена се бори со вирусна инфекција и силна болка во колкот.
Компани речиси целиот натпревар го помина седејќи на клупата за време на победата над Лајпциг во саботата (6:1), додека водството на тимот од аут-линијата му го препушти на помошникот Арон Денкс.
Сериозноста на неговата здравствена состојба најдобро се докажува со фактот дека 40-годишниот тренер морал да лежи на кауч во Алијанц Арената за време на полувремето, но и по завршувањето на натпреварот.
Според германски „Билд“, Компани останал дома во понеделникот и го пропуштил тренингот зад затворени врати, а бил прегледан и од медицинскиот тим на Баерн.
Проблемите со колкот наводно се поврзани со инфекција која предизвикала болка на местото на стари повреди. Белгиецот имал видливи тешкотии при одењето против Лајпциг, особено при искачување по скалите од тунелот на теренот.
Тој не се појави пред прес-конференцијата по натпреварот и беше заменет од спортскиот директор Макс Еберл.
„Тој моментално лежи во тренинг-салата. Навистина не се чувствува добро“, рече Еберл, кој сепак верува дека Компани ќе биде подготвен за Арсенал.
„Цврсто веруваме дека нема да има проблеми до среда, иако сè уште не можам да кажам каква точно улога ќе има за време на натпреварот“, додаде Еберл.
Интересно е што капитенот на Баерн, Џошуа Кимих, дури и не забележал колку се мачел неговиот тренер.
„Што му е? Не забележав ништо. Мислам дека едноставно не му се зборуваше со вас“, се пошегува германскиот интернационалец со новинарите.
Компани планираше да го води својот последен тренинг против Арсенал денес, а конечната одлука за неговото појавување на аут-линијата се очекува по прес-конференцијата закажана за 16 часот.
Баерн и Арсенал се среќаваат утре во 21 часот на „Алијанц Арена“, во третото коло од Лигата на шампионите.
