Францускиот клуб Марсеј го контактирал Чаби Алонсо за да ја истражи можноста и неговата желба да го преземе тимот, но самиот тренер ја одбил понудата, информира „RMC“.
Тимот остана без тренер по тешкиот пораз од ПСЖ со 5:0, по што Роберто де Зерби, кој до тој момент го водеше тимот, поднесе оставка. По тоа следеше и оставка од спортскиот директор на тимот, Мехди Бенатија, но таа беше одбиена.
Француското издание додава дека одбивањето на Чаби Алонсо е сосема очекувано со оглед на хаосот во клубот, а воедно и повисоките амбиции на тренерот. Шпанецот, кој беше отпуштен од Реал Мадрид пред само неколку недели, веќе беше поврзуван со некои од најголемите клубови во Европа, како што се Ливерпул и Манчестер Сити.
Во меѓувреме, Марсеј продолжува да разгледува различни опции за нов тренер. Клубот изрази сериозни амбиции сериозно да ја оспори доминацијата на ПСЖ во последната деценија. Од „Велодром“ инвестираа многу, но и покрај ова, не успеаја да станат сериозен конкурент на Парижаните, додека клуб со многу поскромно финансирање како Ленс, моментално е водечки во Лига 1.
