Претседателот на Реал Мадрид, Флорентино Перез, според шпанските медиуми, подготвува нова правна офанзива против Барселона пред УЕФА поради аферата „Негреира“, еден од најконтроверзните случаи во поновата историја на шпанскиот фудбал.
Случајот вклучува обвинување на Барселона дека им плаќала на компании поврзани со Хозе Марија Енрике Негреира, поранешен потпретседател на Техничкиот комитет на судиите, од 2001 до 2018 година. Истрагата покажа дека каталонскиот клуб платил околу 8,4 милиони евра во тој период, но сè уште не е докажано дека овие плаќања ѝ дале на Барселона директна предност на теренот.
Во 2024 година, судот го отфрли обвинението за поткуп на јавен службеник бидејќи беше утврдено дека Негреира нема статус на јавен службеник според шпанскиот закон. Сепак, постапките поврзани со можна спортска корупција се уште се отворени.
Барселона призна дека плаќањата постоеле, но тврдеше дека биле наменети за анализи на судиите, извештаи и подготвителни материјали за тренерскиот персонал.
Реал Мадрид сака сериозни казни
Сепак, во Мадрид веруваат дека случајот е далеку од затворен. Според новинарот Хозе Феликс Дијаз, Перез подготвил сеопфатно досие од 500 страници кое треба да биде испратено до УЕФА. Реал Мадрид наводно бара строги санкции за својот најголем ривал, вклучително и одземање на титули и можна суспензија од европските натпреварувања.
„Реал Мадрид бара од УЕФА да ѝ ги одземе титулите на Барселона поради случајот Негреирa. Исто така, постои барање за исклучување на клубот од европските натпреварувања. Досието со докази за неправилности што го подготвува Флорентино Перез е на пат“, вели Хозе Феликс Дијаз.
Во периодот опфатен со истрагата, Барселона освои вкупно 33 трофеи, вклучувајќи четири титули во Лигата на шампионите и три Суперкупа на УЕФА. Не е јасно дали евентуалното барање на Реал Мадрид би се однесувало само на европските трофеи или би барало и преиспитување на домашните титули. Барселона, исто така, освои осум титули во лигата во тој период.
Случај што може да предизвика земјотрес
Со месеци во Шпанија се води жестока дебата за тоа дали аферата „Негреирa“ е најголемиот скандал во историјата на локалниот фудбал. Реал Мадрид од самиот почеток инсистираше случајот да биде целосно истражен, додека Барселона тврди дека станува збор за организирана кампања од страна на медиумите и ривалите со цел да се наруши угледот на клубот и да се намалат спортските успеси од една од најтрофејните ери во неговата историја.
Прашањето за можен домино ефект е особено нагласено доколку УЕФА навистина одлучи да ја казни Барселона. Во случај на одземање на титулите или исфрлање на клубот од европските натпреварувања, тоа би отворило и можност за ревидирање на историските рангирања, доделување трофеи на второпласираните клубови, а исто така и потенцијални тужби од други клубови кои би можеле да тврдат дека биле оштетени во периодот што е под истрага.
УЕФА досега беше многу резервирана во своите јавни изјави, велејќи дека го следи развојот на ситуацијата во Шпанија и тековните судски постапки. Сепак, европската фудбалска организација има механизми со кои може да дејствува независно од одлуките на домашните судови доколку процени дека интегритетот на натпреварувањето е сериозно нарушен. Токму тука Перез и Реал Мадрид гледаат можност да извршат дополнителен притисок.
Од друга страна, Барселона вели дека е подготвена да се брани со сите законски средства и дека, во случај на драстични одлуки од страна на УЕФА, ќе одговори со контратужби. Клубот нагласува дека досега ниту еден суд не утврдил дека имало директно влијание врз резултатите од натпреварите и дека целиот случај се користи за дестабилизација на тимот на спортско и финансиско ниво.
