Најдобриот тенисер во светот, Јаник Синер, е во болницата Сан Рафаеле во Милано, каде што е на претходно планирани медицински прегледи по здравствените проблеми што ги имаше за време на овогодинешниот Ролан Гарос.
Според информациите од Италија, Синер би можел да остане под надзор на лекарите во наредните денови, со цел да се завршат сите планирани дијагностички процедури.
Сепак, неговото враќање на теренот се очекува веќе во среда, кога треба да продолжи со тренинзите во Монте Карло.
Исто така е познато дека Италијанецот нема да игра на ниту еден турнир на трева пред почетокот на Вимблдон, па затоа ќе го искористи следниот период за закрепнување и подготовка за третиот Гренд слем во сезоната.
Синер во последните денови беше на одмор во Сардинија со својата девојка, откако доживеа големо разочарување во Париз.
Светскиот рекет бр.1 имаше предност од два сета и водство од 5-1 против Хуан Мануел Серундол во второто коло на Ролан Гарос, но од третиот сет почна да чувствува здравствени проблеми што значително влијаеја на неговата игра.
На крајот, се случи пресврт и пораз по пет сета.
Кратко по елиминацијата од Париз, Синер го посети медицинскиот центар „J Medical“ во Торино, каде што беше подложен на низа детални прегледи и анализи.
По неколкудневен одмор во Галура, Сардинија, тој одлучи да ги продолжи лекарските прегледи во болницата „Сан Рафаеле“ во Милано, со цел да се утврди причината за проблемите што му се случија за време на натпреварот со Серундол.
Засега нема знаци на сериозни компликации, а планот на неговиот тим останува непроменет – враќање на тренинзите во Монте Карло и целосна подготовка за настапот на Вимблдон.
