Реал Мадрид направи голем чекор кон осминафиналето во Лигата на шампионите. Во првиот натпревар од плејофот на „Естадио да Луж“, ја победија Бенфика со 1-0, а единствениот гол го постигна Винисиус Жуниор.
Сепак, натпреварот беше обележан со сериозен инцидент. Винисиус го обвини Џанлука Престијани од Бенфика за расистички напад по постигнување на голот, а судијата Франсоа Летексиер го активираше протоколот против расизам и накратко го прекина натпреварот.
Според неколку извештаи, тензиите ескалирале по прославата на голот на Винисиус, а фокусот било на однесувањето на Престијани – во еден момент наводно ја покрил устата со маицата додека разговарал со крилниот напаѓач на Реал, што предизвика дополнителни сомнежи и реакции на теренот.
Винисиус по натпреварот изјави дека расистите се „кукавици“, додека јасна поддршка дојде од таборот на Реал – се спомена и ставот дека тимот ќе го напуштел теренот доколку Винисиус инсистирал на тоа.
Мурињо под лупа
Бенфика ја води Жозе Мурињо, а неговата реакција предизвика мешани реакции. Во јавните настапи, тој нагласи дека Винисиус не треба да „влегува во конфликт со трибините“ по постигнување гол, признавајќи дека победата на Реал била заслужена.
Некои мадридски медиуми тврдат дека ваквите пораки го налутиле претседателот на Реал, Флорентино Перез. Според нивните информации, Перез ги смета коментарите на Мурињо по натпреварот за неприфатливи.
Со победа од 1-0 во Лисабон, Реал ќе има јасна предност во реваншот и шанса да го потврди својот пласман во следната рунда пред своите навивачи. А Бенфика, покрај резултатскиот дефицит, сега е под притисок поради инцидент што излезе од рамките на спортот.
