Претседателот на Ла Лига, Хавиер Тебас, продолжи со вербалниот напад врз Реал Мадрид откако навивачите на „кралскиот клуб“ кренаа провокативен транспарент за време на натпреварот со Севиља. На него пишуваше: „Ова не е фудбал, ова се Тебас и Негреира“.
"No es fútbol, son Tebas y Negreira"
Así la pancarta de la afición del Real Madrid mostrada en el partido contra Sevilla. 👀 https://t.co/vWyzqiKC0f
— ESPN Deportes (@ESPNDeportes) October 18, 2026
Реакцијата на првиот човек на шпанското првенство не се одолговлекуваше, бидејќи го искористи инцидентот за да ги поддржи своите претходни обвинувања против комуникациската стратегија на мадридскиот тим.
„Само два дена беа доволни фактите да почнат да докажуваат дека сум во право“, напиша Тебас на социјалните мрежи. Тој потсети дека претходно го именувал новинарот Томас Гонзалез-Мартин од изданието „Ел Дебат“ како глас на пораките на раководството на Реал Мадрид.
Клубот одговори дека не се одговорни за мислењата на новинарите кои не се дел од организацијата.
Тебас, сепак, ја доведе во прашање оваа разлика откако навивачите на Реал кренаа транспарент што го поврзуваше неговото име со случајот Негреира.
„А сега ќе го објаснат ова како мислење на некој што нема никаква врска со клубот?“, реторички праша претседателот на Ла Лига.
Тој повторно инсистираше навивачите на Мадрид да ги објават своите барања за промени на термините на натпреварите и да покажат кои од нив се исполнети.
Конфликтот меѓу Тебас и Реал Мадрид ескалираше откако шефот на Ла Лига го спореди начинот на кој телевизискиот канал на клубот, Real Madrid TV, го критикуваше судењето со пропагандните методи на нацистичкиот министер Јозеф Гебелс.
Навивачите на Мадрид ги оценија неговите зборови како неприфатливи и побараа негова итна оставка.
