Ливерпул сакаше да го доведе Марк Геиа и да го спои со Вирџил Ван Дајк, со што ќе формираа еден од најсилните централни дефанзивци во Премиер лигата. Марк на крајот отиде во Манчестер Сити, но „црвените“ добија нешто друго. Тие имаат двајца централни бекови околу кои можат да формираат бековска линија во иднина. Едниот е Џовани Леони, кој моментално се опоравува од повреда, а другиот е – Џереми Жаке.
Младиот централен бек (20) официјално е претставен како нов играч на „црвените“, кои долго време се обидуваат да го скршат Рен и конечно успеаја да постигнат конечен договор. Ливерпул ќе плати 63.000.000 евра со бонуси што би ја довеле цената до 72.000.000. Плус, Жаке ќе остане во Бретања како позајмен играч на клубот од „Енфилд“. Жаке стана вториот најскап дефанзивец во историјата на Ливерпул, единствениот кој беше платен повеќе од него беше Ван Дајк (84.650.000 евра).
Доаѓањето на младиот Французин би можело да значи предавање на палката во блиска иднина и почеток на живот без долгогодишен столб во одбраната. Ова е првата вистинска сезона на Џереми во сениорскиот тим на Рен. Тој се искачуваше по скалилата на клубот, помина низ младинските селекции и Б-тимот, го вкуси сениорскиот фудбал на 18-годишна возраст (четири минути во натпревар против Ница), а потоа беше испратен во второлигашот Клермон на една година за да се „зацврсти“.
Минатата зима, тој беше вратен во првиот тим на Рен и се зацементира во стартните единаесет кога Рен реши да ја размрда централната линија на средина од сезоната. Ова лето, по само половина сезона сениорски фудбал во Лига 1, Лајпциг, Кристал Палас, Интер, саудиските клубови Ал Хилал и Ал Наср го сакаа… Но, Рен е сериозен клуб и преговарач кој не паѓа на „прва“, пишува „Моцарт спорт“.
Тие го држеа очекувајќи неговата цена да се зголеми. И беа во право. По одличните игри во првата половина од оваа сезона, Баерн, Реал Мадрид, Манчестер Јунајтед и други големи имиња беа заинтересирани за Жаке. Но, Челси и Ливерпул беа оние кои најмногу се држеа до него.
Рен знаеше какво богатство има и ја одреди цената на повеќе од 60.000.000 евра, сакајќи да го сруши трансферниот рекорд на Џереми Доку, за кого Манчестер Сити плати 60.000.000 евра. „Сините“ понудија 35.000.000, потоа 50.000.000, се заканија дека нема да дозволат уцени, но Рен упорно продолжи и на крајот го доби она што го сакаше.
Фото: Фабрицио Романо
