Фудбалската репрезентација на Македонија продолжува со подготовките за гостувањето кај Република Ирска утре, 31.март, во Даблин. По поразот од Данска, фокусот во националниот тим е насочен кон подобрување на формата пред дуелот кој нема поголемо значење.
Дефанзивецот Ѓоко Зајков потенцира дека тимот извлекол поуки од претходниот натпревар и дека клучот ќе биде во менталната стабилност во текот на целиот меч.
„По направената анализа (од мечот со Данска – н.з.), јасно е дека имаше неочекуван пад по првиот примен гол. Тоа е сегмент на кој мора да работиме, кога ќе примиме гол, да не паѓаме како екипа, туку да се издигнеме и да реагираме подобро. Сега сме целосно фокусирани на Ирска. Не постојат пријателски натпревари, секој меч го играме на победа. Сакаме да се надигруваме со секого и да покажеме квалитет, како што сме знаеле и претходно. Многу е важно и од психолошки аспект да одговориме по поразот од Данска. Со добар резултат можеме побрзо да го оставиме тој натпревар зад нас и да изгледаме подобро во следните предизвици и квалификации”, изјавил Зајков, цитиран од ФФМ.
