Мандатот на Ергин Атаман во Панатинаикос заврши по три години на чело. Клубот официјално го објави заминувањето на турскиот стручњак по состанокот со сопственикот Димитрис Јанакопулос. 60-годишниот тренер имаше уште една година од договорот, кој беше обновен во летото 2024 година.
Атаман го предводеше Панатинаикос до титулата во Евролигата во својата прва сезона, а во сезоната 2024/25 го квалификуваше тимот за Ф4 на турнирот. Сепак, оваа сезона „Детелините“ не успеаја да стигнат до финалната фаза од натпреварувањето.
Thank you, Ergin! #paobcaktor pic.twitter.com/FDXTWaMicV
— Panathinaikos BC (@Paobcgr) June 15, 2026
Минатата сезона, Панатинаикос го освои Купот на Грција, но загуби со 2-3 од Валенсија во плејофот на Евролигата. Во грчкото првенство, тимот остана на второто место, губејќи ја финалната серија со 2-3 од вечниот ривал Олимпијакос.
За време на неговиот престој во Атина, турскиот тренер освои два грчки Купа, титулата во грчкото првенство во 2024 година и триумфираше во Евролигата во Берлин.
Со овој успех, Ергин Атаман стана трикратен шампион на Евролигата, откако претходно освои два последователни трофеи со Анадолу Ефес во 2021 и 2022 година.
