Жозеп Марија Берокал ја забележа својата прва победа како селектор на кошаркарската репрезентација на Македонија, откако вечерва во „Градски парк“ нашите кошаркари ја победија селекцијата на Луксембург со 79:70 и со тоа го задржаа максималниот ефект во групата „А“.
„Победата е важна за почетокот на овој проект. Не смееме да заборавиме дека сме заедно само четири дена што не е лесно и за мене како тренер и за тимот. Имаше добри работи, како трчањето и одбраната. Но имавме и падови во играта што не смеат да ни се повторат.
Им честитам на играчите поради тоа што немавме доволно време да се вклопиме. Сакам да играме добра одбрана, не е лесно да се игра 40 минути на тоа ниво, но тоа е нашата цел. Задоволен сум од пристапот на играчите бидејќи главно го исполнија она што го побарав од нив. Треба само да го зголемиме бројот на добри минути во играта, да ја движиме подобро топката и да играме како тим, а не индивидуално“ – рече новиот селектор по натпреварот.
