Извршниот директор на Фенербахче, Дерија Џаниер, зборуваше за иднината на истанбулскиот клуб во Евролигата и рече дека сè уште не донеле конечна одлука, иако иднината на ова натпреварување треба да се знае до крајот на март. Неизвесноста околу клупската кошарка продолжува, а првиот човек на европските шампиони откри дека истанбулскиот клуб сè уште не одлучил во кое натпреварување ќе игра во наредниот период. Тој признава дека процесот на донесување одлуки во врска со евентуалното преселување во НБА Европа трае веќе долго време и дека ситуацијата не е едноставна.
„Размислувам за оваа тема веќе една година. Преговорите со двете организации се уште се во тек, а има многу непознати. Одлуките што ќе ги донесеме влијаат на милиони фанови, па затоа верувам дека е најважно сите да седнеме на иста маса. Личните интереси мора да се стават настрана заради самата кошарка. Само на овој начин можеме да го решиме хаосот што моментално постои во Европа и да ги отстраниме пречките што нè спречуваат да го оствариме нашиот целосен потенцијал“, го цитираше „Basketnews“ турскиот функционер.
Тој зборуваше и за финансиската страна од учеството во европското натпреварување, истакнувајќи дека секако има простор за поголем профит.
„Се создаде впечаток дека Евролигата воопшто не генерира никакви приходи и до одреден степен го разбирам тоа размислување. Заработката треба да биде поголема. Сепак, ако ја завршиме сезоната меѓу првите четири екипи, ќе собереме околу пет милиони евра од самото натпреварување. Покрај тоа, брендот Фенербахче има огромна вредност и очекуваме да надминеме десет милиони евра само од продажба на билети“, заклучи Јанијер.
