Раководството на Евролигата објави дека планира да распредели 3,4 милијарди евра на кошаркарските клубови што учествуваат во елитното натпреварување во следните десет години.
Дополнително, тие најавија две проширувања на натпреварувањето, во 2027 и 2031 година.
Како што објави „Basketnews“, по состанокот на акционерските клубови на почетокот на месецот, десетгодишниот план беше едногласно одобрен од сите 13 акционерски клубови. Целта на планот е значително да се зголемат комерцијалните приходи на лигата и економската распределба на клубовите учеснички, а воедно да се создадат нови можности за инвестиции и проширување.
Според бизнис планот, Евролигата има за цел 648 милиони евра годишни комерцијални приходи до десеттата година.
Проширувањето е уште еден клучен столб на стратегијата. Се наведува дека елитното натпреварување треба да заработи 1,2 милијарди евра од франшизни такси преку два потенцијални прозорци за проширување, планирани за 2027 и 2031 година.
Се очекува преминот кон франшизен модел да донесе моментално зголемување на вредноста на клубoвите и на лигата почнувајќи од сезоната 2026/2027, со очекуван раст на вредноста од 25 проценти.
Долгорочната одржливост на клубовите останува централна цел на планот.
„Сè поголем број наши лиценцирани клубови постигнаа одржливи финансиски перформанси во последните години, при што 40 проценти моментално се на таа позиција. Сите клубови ја гледаат целосната одржливост како апсолутен приоритет, а десетгодишниот бизнис план го става ова во самиот центар“, рече главниот финансиски директор на Евролигата, Хави Пуџада.
