Синоќа на НБА терените се одиграа три натпревари од првото коло од плејофот, а единствениот тим што ја зголеми својата предност во серијата беше Лос Анџелес Лејкерс.
Леброн Џејмс постигна 28 поени, со осум скока и седум асистенции, а ослабените Лос Анџелес Лејкерс го издржаа нападот на Хјустон Рокетс и славеа со резултат од 101:94, со што поведоа со 2:0 во првото коло од плејофот.
Маркус Смарт додаде 25 поени и седум асистенции за Лејкерс, кои по втор пат по ред ги надоместија отсуствата на Лука Дончиќ и Остин Ривс со заеднички напор предводен од 41-годишниот Џејмс.
Лос Анџелес повторно ја заврши работата, иако Кевин Дурант се врати во поставата на Рокетс, постигнувајќи 23 поени, но само три во второто полувреме кога се „кршеше“ натпреварот.
Лук Кенард постигна 23 поени за Лос Анџелес, кои одржуваа минимално водство речиси целата последна четвртина. Смарт го пронајде Џејмс како трчана 55 секунди до крајот за забивање, а Кенард потоа погоди две слободни фрлања за да ја запечати победата.
Третиот натпревар од серијата ќе се игра во петок во Хјустон.
Алперен Шенгун постигна 20 поени и 11 скока за петтопласираните Рокетс, но тимот повторно имаше големи проблеми во офанзивата, дури и со Дурант, кој го пропушти првиот натпревар од серијата поради повреда.
Џабари Смит Џуниор додаде 18 поени, Амен Томпсон 16, но Рокетс шутираа само 40,4 проценти од полето и успеаја да погодат само седум тројки.
Резултати:
Бостон – Филаделфија 97:111 (во серијата 1:1)
Сан Антонио – Портланд 103:106 (во серијата 1:1)
Л.А. Лејкерс – Хјустон 101:94 (во серијата 2:0)
