Покрај настапите во АБА2 и домашното првенство, македонскиот кошаркарски шампион МЗТ Скопје во сезоната 2026/27 ќе настапува и во ФИБА Еврокупот. Тимот од Аеродром се враќа во оваа конкуренција по пауза од две ипол децении.
Ривалите во ова натпреварување ќе ги дознаеме по ждрепката на 16 јули во Минхен.
„Враќањето во Европа е уште една потврда за континуираниот развој на клубот и нашата амбиција МЗТ Скопје и понатаму да биде вистински амбасадор на македонската кошарка надвор од границите на државата. Нè очекува долга и предизвикувачка сезона, исполнета со силни противници, голем број натпревари и нови докажувања. Но, токму ваквите предизвици се мотивот поради кој постоиме и растеме. Нашата цел останува иста – достоинствено да го претставуваме македонскиот спорт, да бидеме конкурентни на секој терен и уште еднаш да покажеме зошто МЗТ Скопје со децении е симбол на македонската кошарка во Европа“, стои во објавата на МЗТ.
