Тимот на Анадолу Ефес би можел да доживее големи промени на клупата следната сезона, а како што објави угледниот „Еурохупс“, главни кандидати за преземање на кормилото на турскиот тим се двајца Грци – Јанис Сферопулос и Василис Спанулис.
Иако актуелниот стратег Пабло Ласо е под договор до 2027 година, катастрофалните резултати во Евролигата го принудија раководството на истанбулскиот клуб веќе да размислува за негова замена. Ефес го заврши елитното натпреварување на претпоследното место со скор од 12 победи и 26 порази, што се смета за еден од најголемите неуспеси во модерната историја на клубот.
Според извори блиски до клубот, Јанис Сферопулос во моментов е чекор пред Спанулис. Грчкиот стручњак, кој ја започна тековната сезона на клупата на Црвена звезда, веќе имал одредени разговори со челниците на Ефес, што го става во пол-позиција за оваа престижна работа.
Неговото искуство во водењето на екипи од Евролигата и стабилноста што ја носи се клучни фактори зошто Турците го сакаат на својата клупа.
Легендарниот Василис Спанулис се споменува како втора опција. Гркот брзо го гради својот тренерски углед по неверојатната играчка кариера и моментално се смета за еден од најталентираните млади тренери во Европа. Сепак, тој засега останува „план Б“ во случај преговорите со Сферопулос да не вродат со плод.
Ситуацијата во Ефес е далеку од идеална и на домашен план. Во турското првенство (BSL), тимот моментално е само на петтото место со резултат од 19-10, што е далеку под амбициите на клубот кој до пред само неколку сезони доминираше во европската кошарка и кој врза две титули европски шампиони.
