Стартот на Големата награда на Мајами, четвртото коло од овогодинешното првенство во Формула 1, е одложен поради невреме и ќе биде во 19 часот по централноевропско време, три часа порано од првично планираното.
Одлуката ја донесоа заеднички Меѓународната автомобилска федерација (ФИА) и Формула 1, откако беше направена проценка дека силен дожд може да ја погоди патеката во Мајами во времето предвидено за почеток на трката.
„По разговорите меѓу ФИА, Формула 1 и промотерите на Мајами, донесена е одлука почетокот на Големата награда на Мајами оваа недела да се помести во 13 часот по Мајами поради временските услови за кои се очекува да донесат посилни бури подоцна попладне, блиску до првично закажаното време за почеток. Оваа одлука е донесена за да се обезбеди минимално нарушување на трката, како и да се обезбеди најдобро можно време за одржување на Големата награда во најдобри можни услови и да се даде приоритет на безбедноста на возачите, навивачите, тимовите и персоналот“, се вели во заедничко соопштение на ФИА и Формула 1.
Пред квалификациите, ФИА прогласи и „ризик од дожд“, што според новите прописи од 2026 година значи кога шансата за влажна трка е над 40 проценти. Во овој случај, тимовите можат да направат дополнителни промени на автомобилот под условите на Парк Ферме кои инаку би биле забранети, со цел да ги прилагодат автомобилите за влажни услови.
Доколку врне дожд за време на новиот датум, ќе бидат воведени дополнителни ограничувања – намалување на максималната моќност од MGU-K од 350 kW на 250 kW, забрана на режимот „Boost“ и отворање само на предното крило како дел од активната аеродинамика.
Она што сè уште може да претставува предизвик во лоши временски услови се локалните прописи за грмежи. Имено, ако се забележи удар од гром во радиус од осум милји (околу 12,8 километри) од патеката околу стадионот Хард Рок, трката веднаш ќе биде прекината, а сите гледачи и персонал ќе мора да побараат засолниште. Исто така, продолжувањето на трката е дозволено само 30 минути по последниот удар од гром, што може да доведе до повеќекратни прекини или одложувања.
Трката ќе започне од пол-позицијата со моменталниот лидер во генералниот пласман Андреа Кими Антонели во Мерцедес, пред четирикратниот шампион Макс Верстапен во Ред Бул.
